前晚嘅飯局由民建聯同經濟動力負責約人，雖然佢哋都否認係飯局嘅召集人或主持，但事實上兩個政團嘅話事人，都咁啱得咁蹺坐咗喺飯枱嘅中間主席位，並且有帶頭發言同祝酒，形同影子召集人。當與會者傾開前日煲呔曾發表施政報告，社民連三子又玩掟蕉同掃枱時，有與會者話，有人好適時咁提議係咪應該做啲嘢譴責有關行為，究竟係巧合即興定係早有預謀，大家心中有數。

茂波怪醫英姐唔跟大隊

尋日煲呔曾出席立法會答問大會，社民連三子唔知係咪收到風建制派要做嘢，於是改變策略，由武鬥改為文鬥，冇再掟嘢，但就多次喺煲呔曾發言時插嘴搗亂，最後都係畀立法會主席趕晒離場。建制派會後歷史性首次舉行聯合記者會，發表聯署聲明譴責社民連三子嘅行為，指摘佢哋本周三在煲呔曾宣讀施政報告期間滋擾與會者，阻礙特首發言，甚至向主席擲物，嚴重破壞議會形象，對社會造成不良形象。佢哋並對其他泛民喺前日會議上展示標語牌表示關注，要求立法會主席做番啲嘢。唔知下個月政改報告公布後，佢哋又會唔會好似今次咁，搞番啲聯合行動同泛民抗衡呢？

其實尋日發表嘅聯署聲明包括兩部分，首部分係譴責社民連三子嘅粗暴行為，除咗霍震霆身在海外，其餘三十五名建制派議員都有簽名，可以話係史無前例。不過第二部分質疑其他泛民舉牌抗議嘅聲明，就只有三十二人聯署，「五散人」成員陳茂波、「怪醫」梁家騮同勞聯李鳳英都冇簽名，顯示建制派同泛民一樣唔係鐵板一塊，好難令三十六人對每件事達致統一意見。

又好似之前建制派曾考慮派出專業會議劉秀成，挑戰泛民劉慧卿出任財委會主席，但最終因為部分建制派議員堅持撐卿姐而作罷。同屬專業會議嘅何鍾泰，尋日同卿姐爭政制事務委員會副主席時，亦有兩名建制派委員「倒戈」投咗畀卿姐。睇嚟建制派想達致真正團結，都唔係簡單食吓飯乾幾杯就可以做到。