豪宅樓價屢創新高，帶動中小型住宅價格不斷上升，令無樓市民難圓置業夢，但政府卻視而不見，信口雌黃話無影響。卓妮問過幾位立法會議員，雖然個個有樓在手，但絕對唔敢話現時樓價合理，反而批評樓價高到已經同中產脫節，有議員因此暫停入市，亦有女議員改買黃金，一來降低風險，閒時欣賞吓令個人開心啲。
從事玩具業嘅經濟動力成員林健鋒（Jeffrey），買豪宅綽綽有餘，為何不趁升市買兩個單位炒吓賺番筆呢？Jeffrey笑稱：「買兩呎就差唔多，做議員只係五萬幾元一個月，買一呎豪宅都未夠！」
林健鋒倡恢復賣地
講笑還講笑，Jeffrey建議政府應該恢復賣地，只有起樓才會令樓價回落。他憶述，九七年樓價暴升，當時佢覺得貴得好離譜唔敢買，結果樓價大跌，前車可鑑，高追就要小心嘞！
貴為上市公司主席嘅「I.T.豪」譚偉豪都話，豪宅炒到七萬元一呎，已經脫離現實，他認為，豪宅呎價超過二萬元已經不合理，與中產脫節。有幾間物業在手嘅專業會議梁美芬坦言，睇住樓價升當然開心，相信無人想見到出現負資產，但現時樓價升幅確實唔係好健康，與中產人士能力脫節，無法「上車」，皆因政府放任地產發展，正常賣地可調節樓價。
梁美芬轉投資黃金
梁美芬話：「以前我都好建議人哋買樓，但依家睇到樓市唔健康，連自己都卻步，反而轉買黃金，得閒攞出嚟睇吓都開心啲！」手頭有批細價樓嘅會計界陳茂波（Paul）都話唔敢掂豪宅，佢話無論寫字樓或住宅物業，今年升幅都好厲害，中產置業絕對唔容易。阿Paul教路，買樓切勿追求名廈，亦不要介意買二手樓，香港區好似海怡半島、杏花邨、康怡花園呢類住宅都幾好住，勝在交通便利嘛！
卓妮