因乜事幹無厘啦更提起食肆牌照？因為有一種食肆嘅老闆捶胸頓足呼天搶地，人人都可以享受豁免牌照費一年嘅甜頭，唯獨係佢哋成為冇糖食嘅孤兒仔。

就咁嘅，先講講發生乜嘢事先啦。舊年出現可怕到極嘅金融海嘯吖嘛，成個地球打晒冷震債務重組，跟手玩咗一場金融經濟體系洗牌遊戲，特區政府乜都唔識做，振興經濟當然係一籌莫展啦。之不過咁，宏圖大計就話冇啫，小恩小惠派粒糖安撫一下情緒都有嘅，所以政府今年五月就宣布嘞，豁免餐飲業相關牌照費一年。呢粒糖細係細咗少少，好過冇咁話囉。

正常理解，餐飲業相關牌照即係所有食肆，大酒樓又係食肆，快餐店又係食肆，茶餐廳都係食肆……忽然之間，有人舉手，愁眉苦臉扁晒嘴咁話：唔制呀！佢哋唔派糖畀我呀！佢哋話我攞嗰個唔係餐飲業相關牌照呀！

被遺棄嘅孤兒仔係邊個呢？原來係外賣小食店東主，佢哋攞嗰個牌照好奇怪，叫做食物製造廠牌照，牌費每年盛惠五千一百七十大元。

呢嗱嗱嗱，咁就玩死嘞，可能係因為有一個「廠」字啩，既唔係酒樓，又唔係餐廳，所以唔算餐飲業。食環署發言人承認，政府公布嘅紓困措施之中，食物製造廠牌照係冇得受惠嘅。換言之，外賣小食店成為滄海遺珠，想話慳番五千蚊牌費都唔得。

照咁睇，政府係咪大細超呢？會唔會又係曾蔭權親疏有別嘅延續？計功夫茶話齋，大細超嘅嫌疑固然係存在啦，不過更加有可能係，成班瞌眼瞓官僚根本連自己都搞唔清楚到底有幾多種食肆牌照，或者食環署署長卓永興家陣先至如夢初醒，吓？乜有啲咁嘅「樹」咩？外賣小食店攞嘅係食物製造廠牌照咩？

施政粗疏呢家嘢，香港人都見怪不怪嘞，派糖派到甩甩漏漏當然唔係乜嘢大新聞。功夫茶比較擔心嘅係，見微知著，一葉知秋，食肆牌照又多又煩又混亂，其實反映做生意十分困難。你知啦，如果一個地方嘅發牌制度亂七八糟，等於趕走商家㗎咋，商家走晒咯喎，煲呔曾冇得再口輕輕咁講「想窮都難」㗎喇，只可以口震震咁話「唔死都難」。

幾個月前之嘛，幾乎年年將香港評為「全球最自由經濟體系」嘅美國傳統基金會，高調批評香港嘅牌照審批制度，認為發牌手續過分繁複會影響競爭力。競爭力點樣影響呢？假設你係歐美跨國企業吖，打算喺亞洲開公司，然後發覺香港發牌手續又要過五關，又要斬六將，你好大機會轉個頭去新加坡望一望，咦，原來新加坡發牌手續簡單得多喎，咁你自自然然就會放棄香港。

總而言之，派糖大細超固然係「不該」，發牌混亂更加係情況不妙嘅Poor Guy！