本文重點
中文大學前校長高錕自從奪得諾貝爾物理學獎後，來自四方八面嘅恭賀不絕於耳，搞到高太早前都半開玩笑話自己工作量增加，不停地接電話和查閱電郵。原來有份令高太忙到冇停手嘅係前中大校長李國章（阿瑟王），佢話聽到高錕獲獎後已第一時間發電郵恭賀，而現任中大校長劉遵義仲話稍後會去美國探望高錕，相信高太到時會更忙，起碼茶都要斟多杯。
卓妮早幾日喺中環遇到阿瑟王，佢話高錕獲獎對香港係一種榮譽，亦戥呢位曾經共事過嘅前校長開心，原本打算到頒獎禮現場親自恭賀對方，但主辦機構規定只有親屬先可以出席觀禮，所以惟有透過電郵表達心意。對於外界指高錕獲獎係「遲來的榮譽」，阿瑟王深表認同，佢好感觸話，如果早一兩年頒獎畀高錕，就唔會好似依家咁連諾貝爾係乜都唔係好知！
李國章忙娶新抱
阿瑟王取消親自去恭賀高錕，但劉遵義就坐言起行，尋日出席完行政會議後透露稍後會到美國兩星期探望高錕，他指高錕目前健康狀況和記性都還好。
講開阿瑟王，原來近排家有喜事，佢笑言：「我最近忙緊娶新抱。」阿瑟王個大仔李民英最近與昔日書友仔Tayna拉埋天窗，認真可喜可賀。兩公婆結婚之後，民英會返中大醫學院深切治療部做研究，太太亦會夫唱婦隨嚟香港發展，阿瑟王話最開心係一家人日後可以多啲時間相處喎！
卓妮