港府早前公布東亞運門券整體只係賣咗六成，但其實一啲香港人向來鍾意睇同一早估計會有星級國手出賽嘅項目，開售冇耐就已經全部售罄，好似跳水、羽毛球同乒乓球等項目。

早前劉翔首次傷愈復出，並盛傳有望參加東亞運，立即令本來銷情欠佳嘅田徑項目門券，突然變成搶手貨。有人公開喺網上以高價求售，亦遲遲冇人回應。

小霍攞飛無特權優待

小霍早前就同我哋呻，好多政界名人都以為佢做得港協暨奧委會會長，一定收埋成箱東亞運門券，個個急起上嚟都問佢攞飛，但佢今次都只能伸隻手落衫袋，然後再攞番五隻手指出嚟，事關佢真係冇飛派。佢又話除咗跳水及跨欄等有星級國手參賽嘅項目，統稱體育舞蹈嘅十二項標準舞同拉丁舞賽事，門券亦晨早賣斷市，好多熱愛跳舞嘅闊太名媛都有搵佢幫手，不過佢都係愛莫能助。我哋問過香港體育舞蹈聯會會長洪祖杭，佢話香港的確有好多愛舞之人，體育舞蹈係最早賣斷飛嘅東亞運項目，佢自己都冇多餘門券分畀人。

據聞小霍今次咁失威，背後原來有段古。話說○三年沙士過後，港府資助足總重金禮聘西甲勁旅皇馬來港獻技振奮民心，點知鬧出門券分配醜聞，好多體育界人士都畀廉署請過飲咖啡。自此之後佢哋就唔敢再貪方便亂咁幫人攞飛，即使要做好人，都只能派助手循正常途徑上網或者排隊買飛，冇任何特權同優待。

大輝掟萬元「大包圍」

廠商會立法會議員林大輝就精喇，即使未知實際有乜選手參賽，都已經搵人訂晒大部分日期、項目同賽事嘅門券，不論最後國家決定派乜人落嚟，佢都一定冇走雞。佢話今次東亞運門券定價好平，就算「大包圍」買晒都只需萬零蚊，到時再視乎自己時間同有乜人參賽，決定去唔去捧場。希望佢會將自己用唔着嘅門券送畀其他人喇，否則個個好似佢咁臨場甩底，令觀眾席零零落落就好難睇！