本文重點
今日政圈活動好豐富，朝早有施政報告，夜晚就有立法會建制派議員搞豪華版飯盒會。不過今次唔係佢哋第一次約埋聚餐，上屆立法會會期結束時，佢哋都搞過飯局，只係當時唔識揀日子，撞啱人大嘅山西考察團，最後只有廿五個人去赴宴，出師不利。
通勝：今日忌宴會
九月建制派又諗住翻兜再食飯，點知班議員嗰陣旅行嘅旅行，出Trip嘅出Trip，要集合民建聯、工聯會、專業會議（4P）、經濟動力（4L）、五散人同詹Sir二人組呢幾個組合，仲難過秦始皇一統天下，所以最後個飯局又難產。
吸取前兩次失敗經驗，今次佢哋學精咗，趁個個議員都會喺香港聽施政報告嘅今日嚟搞飯局。負責統籌嘅4L就話，依家已經有大約三十人應承出席飯局，反應唔錯。
不過我哋睇過通勝，發現今日係舊曆八月廿六，忌宴會、設壇等等，總之諸事不宜，所以就算今次個個議員都去食飯，都未必有好結果。眾多忌諱中，通勝話有兩樣嘢係適宜做，其一係宜移祖先，其二係宜拆屋，所以煲呔曾今日嘅施政報告睇嚟要醒醒定定，如果唔係分分鐘畀泛民拆佢台！