「教改女王」前教統局常秘羅范椒芬（Fanny）離開官場後仍難捨教育情懷，兩年前獲低調富豪田家炳資助，跑去重慶窮鄉僻壤培訓英文老師，Fanny入鄉隨俗，餐餐食麻辣火鍋一樣津津有味喎。
Fanny近年投身做港區人大代表，視野都北望神州。尋日港大搞咗個「中國農村教育發展」論壇，佢以過來人身份分享喺農村教英文經歷。Fanny話，兩年前發起一個「農村英語老師培訓計劃」，由佢帶住十幾位香港義工老師，北上重慶四個貧縣嘅學校，向一百位農村老師傳授教英文。
喺農村教書向來唔係優差，但Fanny就愈教愈投入，佢話，農村教學資源極之貧乏，想搵本英文書都難，但老師及學生嘅好學態度就令佢好感動。佢又話，將香港所得嘅教改經驗搬上農村一樣可以大派用場。
猶記得Fanny當年掀起教改，畀唔少老師鬧到飛起，令佢黯然下台，估唔到自己有機會喺中國農村搞教育，難怪Fanny拍晒心口，話明年上京開兩會時，一定會反映農村老師及學生嘅心聲喎。