乜嘢叫做肚滿腸肥嫌冇肉？即係正當人人都愁眉苦臉擔心減薪裁員冇飯開嘅時候，衣食無憂嘅公務員可以擘大喉嚨呻窮，要求逆市加薪咁話。

本來已經滿懷悔恨，家陣更加揼心揼肺，事關功夫茶最近先至知道，公務員仲有一項特權，就係老奉放假唔使做，人工照舊袋袋平安。你話嘞，唔做公務員確係悔不當初o架！

點樣先至可以享受唔使做又有人工嘅特權呢？嗱，首先，你當然要係公務員啦；其次，你是是但但加入其中一支輔助性紀律部隊，輔警又得，醫療輔助隊又得，民安隊都得；然後，你去參加輔助性紀律部隊嘅活動或者訓練，最長連續七日，咁你就可以奉旨放有薪公假。吖，講漏咗一樣嘢，你領取公假出席訓練活動期間，本身職位嘅薪金固然一個崩都唔會少啦，而且有機會額外獲發薪津，以表揚你身水身汗刻苦受訓。換言之，你失驚無神放一次假，可以眉開眼笑兩份糧。

公務員放有薪假受訓，原本嘅工作邊個做呀？梗係捱義氣嘅同事啦，有一個唔願意透露姓名嘅高級公務員就話嘞：「我哋組別只得兩名公務員，其他都係合約員工，佢今日一聲出席周年集訓，第二日就唔見人成個禮拜，年年都係咁，我哋喺毫無心理準備之下，就要接手埋佢啲手尾，咁對我哋係咪公平呢？」

冇錯，好唔公平，所以香港公務員總工會副主席莫敬甫咁講，以往公務員人手充足，呢種做法冇構成太大問題，但係現時前線員工數目大減，十個煲得七個蓋，員工承擔額外工作，難免怨聲載道。莫敬甫又話，公務員放假受訓，工作人哋做，薪水自己袋，對其他同事唔公平。

你就放假雙糧，我就上班做雙工，對於唔係輔警、唔係醫療輔助隊又唔係民安隊嘅公務員嚟講，確係眼火爆㗎。政府假如抱殘守缺不思改進，呢種「公僕內部矛盾」遲早又會添煩添亂。城大專業進修學院學術統籌宋立功就講得啱嘞，現行制度利益分配不公，建議當局盡量挑選非公務員人士擔任輔助隊成員。

係囉，由非公務員人士擔任輔助隊成員咪乜事都冇囉，咁就冇人有特權，而且對於失業大軍都算係半條出路吖。點解係半條出路而唔係一條？因為輔助隊始終只係兼職，唔係正職。

話時話，輔警最近有意增聘大學生，人數比例由原本三分一加到三分二。計功夫茶話齋，既然家陣失業率咁高，已經衣食無憂嘅公務員唔好生霸死霸嘞，騰出空位畀未賺到錢先孭一身債嘅大學生啦，即使搵唔到正職，起碼唔使餓死吖嘛。