抖了一年，由商務及經濟發展局局長變咗做港大經濟金融學院榮譽教授嘅馬時亨，依然咁受歡迎，而且由呢個周末起，一連十二個周末喺電台開咪，尋日我哋去咗呢個新節目《馬教授，你好！》嘅發布會，馬教授同班大學生玩潮語，一句「sor爆」（即係不斷Say Sorry）搞到大家i晒頭，跟住佢仲玩「Chok樣」（變個靚樣），又教大家「旮旯」（音卡啦）嘅正音同意義，簡簡單單就將關心青少年嘅節目主題介紹出嚟。不過馬教授三句不離老本行，話世界經濟由深切治療室轉咗去普通病房，仲預測最遲明年第一季經濟會復甦，畀足晒「十卜」（即係支持）各界，難怪咁多人對佢有好感！
馬教授晒完潮語，好正經咁話，世界經濟仲有不明朗因素，各國財長唔可以掉以輕心，但香港有經濟勢頭好嘅祖國支持，整體環境唔錯，比起美國，香港復甦速度快好多；加上世界經濟已經由深切治療室轉咗去普通病房，去年嘅情況係信心危機，依家信心返嚟，希望就算唔係今年第四季、明年第一季都應該復甦。講到港台嘅問題依家解決咗，唔興手指指嘅佢就話「不在其位，不謀其政」，但今次「收錢」開咪，佢話唔怕畀人請去問話。
馬教授仲講明，幫商業機構開工一定會收錢，事關人工要放落基金做善事。去年佢因病辭官，早前財爺通波仔，係咪應該考慮休息番一年或者辭職呢？馬教授就話每個人都要注意健康，政府官員壓力大，應該抽時間做運動同注重飲食，仲建議政府總部搞個健身房畀啲官強身健體。