粵劇文化早前「升呢」，獲聯合國教科文組織列為世界非物質文化遺產，八和會館主席汪明荃興奮到好似中獎咁開心，但阿姐無被勝利沖昏頭腦，尋日開記者會為粵劇申遺成功拍手掌之餘，不忘轟政府多年來只扶持西方表演藝術，而與粵劇得到嘅資源相比，簡直係杯水車薪，言下之意鬧政府大細超！
汪阿姐尋日拉埋八和一眾副主席及理事亮相，大談香港應該如何食住申遺成功勢頭，大力推動粵劇發展。阿姐滿腹大計，話想興建一所以粵劇為重點課程嘅中學，盡早發掘有潛質嘅粵劇新秀，或者成立粵劇團培訓新秀，事關粵劇界已出現青黃不接現象，即使演藝學院有訓練粵劇系學生，都因缺乏演出機會，功架難登大台。
相比之下，內地政府推動粵劇就不遺餘力得多。阿姐話，喺粵劇發源地嘅佛山，已經有大劇院、粵劇博物館及設立粵劇學校，一條龍培訓粵劇接班人。
睇番香港，雖然政府設立粵劇發展基金撥出二千萬推動粵劇，但筆錢同撥畀香港管弦樂團嗰七千萬相比，一睇就知政府仍然係「重西輕中」，難怪阿姐咁㷫囉。