傑出華人獲國際殊榮，好消息一浪接一浪！繼中大前校長高錕獲頒諾貝爾物理獎後，英國皇家建築師協會日前宣布，美籍華裔建築師貝聿銘將獲頒「皇家金質獎章」，頒獎禮會喺明年二月十一日於倫敦舉行。呢個獎屬於建築界殿堂級獎項，由英女王伊利沙伯二世親自批准，表揚佢喺建築界嘅終身成就。
身在紐約嘅貝聿銘話：「獲RIBA（英國皇家建築師協會）金質獎章深感榮幸，與先前的獲獎者相比，我感到惶恐。」他仲話好期盼可以出席頒獎禮。現年九十二歲嘅貝聿銘已經享譽建築界半世紀，佢嘅作品遍及世界各地，最著名嘅作品包括華府「國家美術館」、波士頓嘅「約翰‧甘迺迪總統圖書館」、以及巴黎羅浮宮整修計劃等。
貝聿銘同香港都好有淵源，佢爸爸貝祖貽有份籌建舊中銀大廈，當時貝聿銘喺香港聖保羅書院就讀，而香港地標性建築物新中銀大廈都係由佢設計，香港婦協主席林貝聿嘉正係佢嘅堂妹。
中大前校長金耀基話高錕獲諾貝爾獎係遲來嘅榮譽，RIBA會長露絲‧利德亦都用類似嘅話嚟形容貝聿銘：「他早就該獲獎，而且實至名歸！」