前恒生銀行副董事長柯清輝退休已有幾個月，但看來依然好忙，唔係工作忙，而係忙於歎世界。柯大俠早排同太太歐遊完返港，隨即又到港大接受名譽大學院士銜，生活非常精彩。我哋前日喺香港會遇到柯大俠，佢依然話嚟緊會飛去外國周圍去玩吓，探吓朋友。咁啱得咁蹺，柯大俠講講吓就遇到老友之一嘅貿易發展局主席蘇澤光，仲即場傾咗幾句。
港股近排上上落落，好多經濟學家預期股市暫時會以「Ｗ」或「Ｌ」形走勢發展，滙控行政總裁紀勤更一口咬定世界經濟復甦會呈「Ｗ」形咁走，難得見到柯大俠，梗係要問吓佢有乜睇法啦！點知柯大俠話：「我都唔喺個市度咯！」但話晒都係財經界專家喎？「專乜嘢家吖，只係過氣專家啫！」柯大俠把口收得咁密，莫非想留番啲料，學啲退休高官咁去大學教書？柯大俠就話：「呢啲嘢暫時唔諗住喇，起碼抖六個月再算。」