08/10/2009

播放本新聞相關短片

政情：港女似箭豬家英哥怕怕

白鴿黨甘乃威爆出疑似示愛事件，誰是誰非恐怕搵包青天都審唔清。汪阿姐老公羅家英尋日出席八和會館記招時就發表男人心聲。佢話男人對女士表示好感，有時只係出於欣賞，並非等同示愛，仲叫港女唔好太敏感。家英哥近年經常北上拍戲，見盡神州美女，佢話內地女性較開放，有時會主動拍吓男仔膊頭，相反港女就好似箭豬咁「起晒弶」，係男人睇見都怕怕喎！港女有乜必要學內地女性咁熱情就見仁見智，不過家英哥最後揀咗香港阿姐汪明荃做老婆，就證明港女可愛啲喇！