前立法會議員譚香文（Mandy）未得當事人同意，大爆「示愛」事件女主角嘅身份同投訴詳情，畀人批評佢博出位同喺女主角嘅傷口上灑鹽。咁啱得咁蹺，卓妮尋日就喺香港會門口撞到佢嘅前黨友公民黨黨魁余若薇（Audrey）同前對手現任會計界議員陳茂波（阿Paul），自然要問吓佢哋點睇呢單嘢。
陳茂波：唔係好熟
我哋問Audrey點睇民主黨議員甘乃威今次「示愛」疑雲，佢明顯唔想多講，淨係話事件除咗影響甘乃威同民主黨，亦可能對香港嘅民主進程造成影響。但問到Mandy爆料事件，Audrey就如釋重負咁話：「佢已經唔係公民黨黨員喇！」睇嚟佢都好慶幸Mandy早前自行退黨，否則今次單嘢分分鐘燒到公民黨身上，似乎有意劃清界線。
至於去年選舉捲土重來擊敗Mandy嘅阿Paul，就話佢同Mandy唔係好熟，仲話未經授權披露性侵犯受害人嘅資料，表面睇似乎唔係好啱。問佢平日有冇讚吓啲女助理，佢話佢助理做得咁好，當然成日都有讚吓對方喇，呢啲都係正常賓主關係，絕對唔會涉及其他嘢。
卓妮轉頭又遇到民主黨議員李華明，問佢「表示好感」算唔算係「示愛」，佢只係以微笑回應。佢仲自爆當年同太太求婚，只係講咗一句「同你一齊好開心」，連「有好感」都冇講，但係佢話三十年前啲人講嘢好含蓄，分分鐘結咗婚都唔會同對方講「我愛你」或「鍾意你」，同依家嘅標準好唔同，絕對唔係有意寸甘威！
卓妮