額頭鼻哥甩皮

教育局局長孫明揚要留守香港，Kenneth難得有機會去天安門參加閱兵慶典，當然要西裝骨骨執到正去啦，但就大失預算曬到燶。Kenneth憶述話，喺「十．一」前幾天，北京日日都好大霧，天色又唔好，個個都擔心慶典當日見唔到太陽，點知閱兵嗰一刻，太陽曬到好似火燒咁，運輸及房屋局局長鄭汝樺、商務及經濟發展局局長劉吳惠蘭等幾位女高官有備而去，馬上戴番頂帽，可惜陳維安事前冇做防曬，兩手空空帽都冇頂，但諗到現場有逾千個中外傳媒對準嘉賓席影相，分分鐘上鏡，為顧及形象，連攞張紙遮吓面都唔敢，焗住曬到紅卜卜，之後起碼黑咗兩、三度，返港成個星期未褪色，額頭及鼻哥更加甩緊皮。

不過，好多政界名人好似佢咁曬到燶，連過去睇過閱兵嘅保安局局長李少光都唔例外。

好在林大輝習慣喺烈日下踢波，曬極都唔黑。佢自爆上京前喺香港花費七千銀訂造一套黑色中山裝參加慶典，所以佢喺北京變身龍友，見到軍車又影，見到參加閱兵表演嘅美女軍人又影。有日喺皇府井大街遇見一位武警，佢上前用普通話要求對方合照，點知對方以廣東話回應話好，大輝笑言，一定係佢啲「煲冬瓜」太水皮，對方寧願講廣東話遷就佢喎。

卓妮