白姐姐尋日證實，阿Paul去年底聘請助理時，女事主都有應徵，仲進入最後二揀一甄選階段。當時女事主講明甘威答應請佢，希望佢哋快啲決定，最後約埋阿Paul、佢本人同一名辦事處顧問，一齊食飯當見工。

最後階段唔成事

白姐姐形容女事主真人靚過影相，「雙眼水汪汪好似識講嘢咁」，但最後冇請到佢。問佢係咪擔心個助理太靚，令阿Paul無心工作？白姐姐話梗係唔係喇，仲話以前幫阿Paul請律師樓職員，就專係鍾意請靚女，不過後來阿Paul話啲靚女成日做唔長，佢先冇再咁做。最後阿Paul唔請呢位女主角，純粹喺因為另一位應徵者有十年議員助理經驗，比女主角嘅年資較長，同外貌完全無關。

對於「表示好感」唔等於「示愛」，白姐姐話，如果個男人平時口花花，三句唔埋兩句就讚人靚女，話會同老婆離婚同女方私奔，咁純粹講句「有好感」就唔代表乜，但如果個男子一向處事認真，好少講笑，感情抑壓得多成日發脾氣鬧人，咁佢單對單向女人表白「有好感」，已經係好強烈嘅示愛。問佢阿Paul係邊類人，白姐姐就話：「佢其實都好抑壓，如果佢向人表示有好感，肯定就係狗上瓦坑有條路！」

教甘威點樣認衰

白姐姐又話，如果佢係甘威，就會承認自己一時把持不住，但一表白完已經知衰縮沙，之後更發現再同女事主一齊工作，遲早又行差踏錯，於是揮慧劍斬情絲，寧願賠錢都要炒咗女主角，咁講法相信大部分香港人、包括啲師奶選民都會接受，聽落又幾有道理噃！

白姐姐估計甘威最後都唔使辭職，但三年後想選番就有啲難度。問佢會唔會叫阿Paul好好借鑑今次事件，佢就慨嘆「乜都係整定嘅，要發生嘅點都阻唔到」，又自爆依家暗戀緊好多人：「如果有人向我表示有好感，我就唔會日日等阿Paul放工！」