至於光纖之父高錕，佢嘅讀書目的當然高尚得多，而且佢係萬中無一嘅傑出學者，功夫茶要豎起拇指大讚一句：書中自有諾貝爾！

因乜事幹要提到黃金屋？功夫茶係想話畀大家聽，今時今日咁嘅讀書態度已經有少少過時，因為經濟環境惡劣，失業率持續高企，讀書不但未必有黃金屋，反而有可能令你未賺到錢已經孭起周身債。不如咁吖，同大家講一個古仔。

舊年十二月喎，有一個三十出頭嘅財務顧問揸住一支玩具槍喺銅鑼灣街頭徘徊，由於佢又風褸、又戴帽、又口罩、又手套，明顯係藏頭露尾怕人見到佢個樣，醒目巡警覺得形迹可疑，一嘢將佢截停，查得兩查仲拘捕埋添。被捕之後呢個財務顧問和盤托出，原來佢收到拖欠大學資助貸款欠債嘅律師信，加上欠落其他債務，所以企圖打劫銀行。到頭來，法官判佢入獄四年半。

唔知大家點諗，功夫茶就覺得家陣嘅學生哥好可憐，未畢業就一屁股債，一畢業又無力償還，眼見債主臨門，惟有鋌而走險。債主係邊個呀？政府囉，學生資助辦事處借錢畀你讀書交學費，然後奪命追魂催你還債。

之不過咁，政府都明白搵食艱難，亦都體諒到青年失業率高企，大學生拖延還款以及破產個案連年上升，所以有消息話，政府正研究容許大學生畢業後三年內暫時毋須還款。即係咁，還款期由現時最長十年延至十三年，但係學生必須自行支付延期利息同埋風險利率。

還款可以拖多三年，學生哥有乜反應呢？不如聽聽香港專上學生聯會代表李耀基點講，佢話對於一名修讀兩年副學士及兩年自資銜接學位課程嘅學生而言，向政府貸款近二十萬支付學費，加上攤分十年還款嘅累積利息，估計共需支付多達三十萬元，等於加重咗學生嘅負擔。李同學批評，延遲還款計劃根本係舊酒新瓶、治標唔治本，只係將炸彈押後爆破。

你都咪話批評得冇道理，假如你畢業之後長期失業冇收入，莫講話延遲三年還款冇乜作用，延十年都係廢嘅啫。再講吖，年期愈拖得長，利息愈積得多，的確唔係好划算。

唉，其實講來講去都係政府一貫慣技，官老爺唔識得刺激經濟創造就業吖嘛，咁咪使出拖字訣囉，夾硬將學生留喺校園，開設五花八門大量好睇唔好食嘅課程，讀完唔知搵唔搵到食嗰隻。好嘞，無論拖咗幾耐，學生始終都係要畢業嘅，冇錢還債點算呢？又拖囉，拖得三年得三年，有拖冇欠咁話。

總而言之，一句到尾，政府無力振經濟，學生欠債好閉翳！