曾俊華早前急性心臟病發，入瑪麗醫院通波仔期間，唔少高官同醫管局高層去探病，都由瑪麗行政總監賴福明負責接待，曾出院時，當然唔少得佢送客。不過，身兼醫管局港島西醫院聯網總監嘅賴醫生尋日向瑪麗嘅同事發電郵，透露佢將於年底退休，仲話好唔捨得瑪麗呢個佢工作咗五年嘅地方，同埋呢個佢醫科畢業後就入去磨練嘅「少林寺」。
聽講賴醫生已兩次延遲退休，今次決定離開瑪麗，係想疊埋心水返美國「湊」孫，但醫管局方面仲好需要呢啲有經驗嘅老手，力邀佢以兼任形式，做醫管局嘅高級顧問（醫療事務），為醫管局參與香港醫院認證先導計劃作準備，睇怕佢退休後，要港美兩邊走。
至於佢嘅接班人，醫管局當然會循例成立遴選委員會搵人補上，但有傳聞話好有機會由衞生署借調過去醫管局嘅質素及安全總監梁栢賢坐呢個位，聽聞參加遴選與否，梁醫生仲係「囉囉攣」，事關轉投瑪麗，佢就要放棄公務員個金飯碗，加上佢又冇乜管理醫院經驗，做咗瑪麗行政總監，隨時做埋港島西聯網總監，睇住成個港島西嘅醫院服務，呢份工作分分鐘吃力不討好，最重要係佢依家喺醫管局嘅角色好重要，連行政總裁蘇利民都唔想佢走。