本文重點
身為教育局局長的「孫公」孫明揚，日日出席大小不同活動，連帶身邊孫太鍾小芬一樣咁活躍，跟住老公周圍「開工」，做「跟得夫人」，尋日保良局喺葵涌梨木樹邨設立嘅美林兒童學習中心開幕，兩公婆又再夫妻檔出席，實行「買一送一」。
一向跟保良局關係良好嘅孫太，笑稱自己係「跟班」，周不時跟住孫公衫尾工作，尤其係探訪工作，但就好享受，眼界大開，好似前日去探訪老人院，尋日就一齊去美林兒童學習中心，接觸嘅人由三歲至九十歲都有，又可以出入平時唔去嘅屋邨，好過逛商場多多聲。孫太仲話，原本想帶埋兩位孫仔一齊來，可惜佢哋未放學，先至唔成事。
「最好的太太」
至於孫公，對太太樂做「跟班」話「無乜所謂」，梗係啦，孫太表現得非常低調，一直喺台下支持，直至一眾嘉賓叫孫太上台拍攝大合照，孫太先肯上台，但堅持唔企孫公旁邊搶鏡。開幕儀式後，喺大夥人要求下，孫太先肯企孫公旁邊合照，唔怪得孫太嘅老友、保良局顧問局委員梁王培芳大讚孫太係「最好的太太」。