本文重點
時間過得好快，卓妮三月底率先爆料話自由黨前主席田北俊報名參加Porsche Travel Club（保時捷旅遊會）嘅法國南部自駕遊豪華團，眨眼間上月底已完成旅程。正當卓妮欣賞田少夫婦靚人靚景之際，發現原來陪田少夫婦一齊歎世界嘅，仲有佢三對夫婦朋友，當中包括「莎姐」周梁淑怡及丈夫周明權，一齊由香港豪到去法國。
同莎姐飲紅酒暢遊小鎮
「波子」豪華團由上月廿三日至廿九日，前後共一星期，除咗領隊座駕外，總共有十一架車浩浩蕩蕩出發，架架「令立立」嘅保時捷一字排開，派頭十足。田少話，成個旅程好鬆動，每朝七點起身歎早餐，食到九點才開車出發，正午十二點到中途站餐廳食晏，食到兩點再開車，下午五點就返酒店稍作休息，然後享用豐富法國紅酒晚餐，當然午餐無紅酒飲啦，事關下午要開車嘛！
田少話，今次旅程沿途大部分都係小鎮風情，好似香港淺水灣到舂坎角咁，亦都有好多彎路。莎姐就最識享受，大部分行程交由丈夫周明權開車，好彩旅程由富有經驗嘅保時捷車廠教車師傅帶路，保證行車安全。開慣名貴跑車嘅田少，經常話香港地少車多，好難試到跑車性能，但今次去到法國就能夠真正感受跑車嘅威力，揸得特別開心！
港人睇卓妮參加自駕團
法國南部自駕遊令田少一再回味外，最雀躍係認識到一班香港朋友，十一架車之中，有九架車係香港人，田少覺得香港人好巴閉。大家一傾之下，原來大部分都係睇咗卓妮三月底嘅介紹，才知悉有個保時捷自駕遊豪華團，於是甚感興趣，紛紛聯絡保時捷車行，結果個個都話無信錯田少，大讚好好玩，估唔到田少做咗保時捷個生招牌！
田少坦言，只係去咗法國七日，但已經好掛住香港嘅美味叉燒喎，估唔到身為旅發局主席嘅田少，去到咁遠都不忘推介香港美食。田少近期驛馬星動，暑假分別去咗地中海郵輪，又到珠海學揸法拉利，上月底去完保時捷法國南部自駕遊，隨即由法國直飛北京參加閱兵儀式。田少二號返港，今日又要出發去黃山，真係無時停。
卓妮