有學者就質疑Mandy咁做，等於喺女事主嘅傷口上灑鹽，造成嘅傷害可能比事件本身更嚴重。Mandy今次真係抽水抽出禍，變咗抽水哥！

未得同意 私自爆料

Mandy去年落選立法會之後，喺政壇依舊非常活躍，包括以平機會委員身份力插平機會主席鄧爾邦隻手遮天、浪費公帑，之後又高調退出公民黨，仲出書自爆喺黨內遭到迫害嘅黑幕。最近甘乃威爆出涉嫌性騷擾醜聞，佢又以女事主嘅前僱主兼疑似代言人身份，多次接受電子同文字傳媒訪問，前晚仲喺一個電台節目上，為女事主被傳媒追訪承受嘅壓力而當眾落淚，擔心女事主一時諗唔開。

不過，原來Mandy從來都冇得到女事主授權披露事件經過，佢仲向傳媒證實女事主嘅姓名，漠視咗當事人嘅私隱。尋日就有報章喺頭版登咗女事主嘅大頭相，喺網上更有好多網民對女事主嘅樣貌評頭品足，連佢細個喺邊度讀書、畢業後做過乜嘢工、以至做傳媒時報道過乜嘢新聞都起晒底，令佢冇晒私隱，被迫承受更大嘅輿論同心理壓力。

最過分嘅係，原來女事主早喺星期一朝早、即Mandy接受完電台訪問後，已經明確要求佢封嘴唔好再講嘢，但佢好明顯冇理會到對方嘅感受，繼續向傳媒爆料。有電視台尋日引述學者意見質疑佢嘅做法，佢就話自己純粹係為咗伸張正義，又自爆女事主係由佢介紹畀甘乃威做助理，令佢覺得好似「送羊入虎口」咁，因此更加要出力幫女事主討回公道。

問佢係咪有意借呢次事件博出位、為將來再戰立法會鋪路，Mandy當然強烈否認，仲誓神劈願話：「我無意選舉……喺港島區（地區直選）。」咁佢會唔會再循立法會會計界功能組別同黃大仙區議會出選呢，佢就冇交代到喇！無論佢背後動機係點，最少都係幫人變咗害人！