黃鴻超致辭嘅時候話，中學生參加呢類嘅活動都唔錯，事關佢以前睇過一個調查，話一個人愈早接受財富管理教育，愈識得未雨綢繆，仲會比較懂得適應社會或者經濟情況轉變；做人變通得快，就自己可以避過好多難題喎。所以佢話中學生應該由細開始好好管理佢哋嘅零用錢，為第時儲定實戰經驗。

聽黃鴻超一席話，實在獲益良多，不過要跟佢學嘅絕對唔止呢啲。黃鴻超都係個精明嘅財富管理者，事關佢同任職創新科技署署長嘅太太王榮珍，喺八月頭樓市唔錯嘅時候，以四千四百幾萬元賣咗之前喺中半山嘅愛都大廈單位，賺咗二千幾萬，絕對係千萬富翁；隔多一個星期，佢哋又買番同屬中半山嘅地利根德閣一個單位連車位，三千幾呎成交價三千萬，計落條數仲有千幾萬淨袋。尋日我哋問佢點解投資咁叻？佢一直笑笑口唔肯講，臨走前只留低一句：「呢啲係私人問題，唔想答！」做官做到咁富貴，睇嚟黃鴻超由細到大累積嘅理財經驗都唔少，大家學嘢嘞！