早前因為急性心臟病入院做通波仔手術嘅財政司司長曾俊華，今日正式返工，計落只係抖咗三日，不過鬍鬚曾可能要證明畀大家睇佢心理及生理上真係好番晒，尋日已經返到辦公室，仲逗留咗七粒鐘，午飯時間只係捱飯盒。鬍鬚曾嘅新聞秘書對我哋話，佢唔係正式返工，只係返去睇吓文件，冇做任何政策決定；不過有電台引述其發言人話，鬍鬚曾尋日係返去處理緊急事務，唔知邊個版本至係真？不過佢由上午十一點鐘返到去，睇文件足足睇到夜晚六點先走人，少啲心神都捱唔到，睇嚟鬍鬚曾真係以行動證明佢「完全好番晒」。
鬍鬚曾上月由美國出席完二十國集團峰會返港後，突然心臟病發入院後，外間有人質疑佢嘅工作能力，可能成為日後競逐特首嘅障礙。雖然鬍鬚曾唔及其他兩個疑似特首候選人咁高調，但點都要做啲嘢證明自己仲有議價能力，之前佢未出院已經叫秘書帶文件畀佢睇，尋日未正式返工都係喺政府總部現身。
今日鬍鬚曾正式返工，早上仲會出席行政會議；睇嚟病發時血壓曾經低到量唔到嘅鬍鬚曾，返工前應該先量一量血壓，咁就萬無一失嘞！