爆出呢個秘密嘅唔係哥頓胡本人，而係佢太太胡郭秀萍。胡太前晚着到靚靚出席「健康快車」慈善音樂會，見佢皮膚白雪雪，以為佢做足防曬上京參加建國六十周年慶典，細問之下，原來胡太去咗美國公幹，未有做跟得夫人，但講起老公及囝囝就令佢忍唔住笑，佢話見到兩父子返港一刻，第一個反應係：「乜你兩個曬得咁黑㗎！」言下之意，哥頓同囝囝一定唔記得帶防曬膏，被迫喺天安門下乾曬幾粒鐘睇閱兵，搞到塊面又紅又黑。

唔知胡太有冇預備幾塊補濕面膜幫兩父子急救肌膚呢？胡太繼續笑騎騎話：「佢哋唔使咁靚喇，我靚咪得囉！」真係服咗佢。