06/10/2009

中環出更:曾憲梓睇圖片展 范太當護法

政界向來論資排輩,尊卑分得好清楚,全國人大常委范徐麗泰帶頭尊重老人家做好榜樣,尋日出席建國六十周年慶典圖片展,范太主動出手「借」出半邊手臂,扶實行動不便嘅前全國人大常委曾憲梓,范太並非係咁意扶吓咁簡單,而係使出左右手同時扶實曾老,細心到極!

中央圖書館尋日舉行新中國成立圖片展,請嚟政商界名人撐場,曾老坐住輪椅到場,佢精神奕奕,但因為年前動過脊椎手術搞到雙腳乏力,上京睇建國六十周年慶典要舟車勞頓,惟有放棄。

不過曾老性格唔易認輸,尋日大會請佢上台主禮時,佢用力由輪椅撐起身,挺起胸膛主禮,咁啱得咁蹺范太同行政會議成員鄭耀棠喺正曾老隔籬,兩人馬上變身「左右護法」扶實曾憲梓。

曾智明未夠班扶爸爸

不過曾老始終有腰患,老人家企唔得耐,范太一於以行動支持佢,加多兩錢肉緊以臂彎撐實曾老,等佢借到力,充分顯示范太對長輩幾咁無微不至。主禮完畢後,范太同棠哥並無放軟手腳,繼續扶埋曾老落台,十足仔女咁體貼。

到底曾憲梓公子曾智明(Ricky)去咗邊呢?原來佢企咗喺後二排,離遠實老竇,佢解釋唔企喺爸爸身邊做「人肉拐杖」,係因為身份唔合適,爸爸話晒係前人大常委,佢左右兩旁位置應該由德高望重嘅前輩企喎。Ricky露出鬼馬笑容話:「佢兩個(范太及棠哥)扶得好開心呀!」

Ricky又分享上京睇慶典感受,話難忘遇見一班有份參與十‧一表演嘅內地青年,喺表演前夕通宵達旦留守天安門做準備,直踩至翌日閱兵儀式,韌力咁驚人,香港年輕人應該好好學習喎。

霍啟剛坐嘉賓席首排

霍英東長孫霍啟剛亦首次跟埋爸爸霍震霆上京睇閱兵,佢同菁英會主席施榮忻(Jaimy)被安排坐喺嘉賓席首排,睇住一排又一排軍人喺面前浩浩蕩蕩操過,Jaimy感覺好震撼!卓妮問啟剛有否相約女友中國跳水公主郭晶晶遊覽北京,佢怕怕醜醜話:「唔講呢啲嘢嘞。」啟剛只講國家大事唔講女友,睇嚟佢真係大個仔囉。

卓妮