先睇睇乜嘢叫做賞心悅目。有一種樹叫做白蘭樹，每逢夏秋兩季開花，嘩！香到呢！所有名牌香水都要行埋一邊！由於實在夠晒香，以前好多女士會喺襟前插一朵白蘭花。

又有一種樹叫做盾柱木，亦即係雙翼豆或者閉筴木。去邊度搵盾柱木呢？其實香港通街都係，你只要喺夏秋之間望見一棵好高好大嘅樹，樹頂開出一簇簇又黃又靚嘅花，如無意外就係盾柱木。萬一唔係盾柱木，應該就係鐵刀木。

好嘞，講完賞心悅目，咁就梗係要講一講居安思危啦。話說以學校林立而聞名嘅深水埗英華街喎，行人路兩旁種咗好多樹，大部分就係白蘭樹同埋盾柱木。理論上，英華街確係名副其實英華滿街，呢棵樹開白色英華，嗰棵樹開黃色英華，白花黃花白花黃花，簡直係心曠神怡啦……咪住，呢個只不過係理論，事實上係點呢？唔好意思，滿目瘡痍！

現場所見，英華街大約七十棵樹之中，超過三分一已經病入膏肓，唔係歪歪斜斜，就係甩皮甩骨。最諷刺嘅係，原本用嚟保護樹木嘅鐵架，反而成為傷害樹木嘅兇器。由於康文署長時間闊佬懶理，樹木愈長愈大，鐵架愈箍愈緊，卒之刮到傷痕纍纍。打個譬喻吖，你同一個三歲小朋友着鞋，原意係保護佢對腳，不過你唔准佢除鞋又唔幫佢換鞋，由三歲一直着到十歲，你估會有乜嘢後果呢？梗係爛腳啦！

就係咁，康文署一直冇幫英華街嘅樹木更換或者移走鐵架，好樹變晒病樹。如果你係日日經過英華街返工返學嘅街坊街里，你會點諗呀？梗係心痛加心驚啦，一個唔好彩又有病樹折枝甚至倒塌，砸死咗都唔知搵邊個填命！

講到呢度，不如回顧一下赤柱塌樹殺人嘅後續發展。首先，死因庭裁定，呢一宗係可以避免嘅悲劇，言下之意係間接譴責政府護樹不力。然後，政府為咗補鑊，委派政務司司長唐英年出任「管樹大隊長」，研究樹木管理政策。跟手，唐英年得出一個阿媽原來係女人嘅結論：管樹部門太多，由於各自為政，所以事倍功半；荒謬嘅係，唐唐唔係指定某一個部門專責護樹，而係阿茂整餅成立多兩個部門，一個係樹木辦公室，一個係綠化辦公室。

嗱嗱嗱，呢啲就係官僚主義嘞，明明知道多老母等於冇老母，偏偏唔去解決問題，反而幫你搵多兩個老母。

所以話啫，死因庭嘅裁定唔係百分之百啱得晒，因為官僚主義作祟，塌樹其實無可避免，係咪殺人視乎好唔好彩㗎咋！