全國人大常委范徐麗泰上北京出席建國六十周年慶典前，女兒范凌華同女婿Alex掏荷包，請佢同姑仔范尚霞去日本北海道過生日，佢哋睇薰衣草、歎溫泉，同品嘗黑毛和牛嘅最高品牌山形牛。潮流興自拍遊，范太自備相機，將日本美麗景色盡收鏡頭之內，點知到旅程結束，范太打開相機一睇，全部相片唔知點解唔見晒，非常詭異。
范太猛然醒起，上次去埃及旅行，又係用同一部相機，啲相又係不翼而飛，相當邪門。范太話，兩次影相操作都同以前無分別，相機無被其他人碰過，亦肯定無唔小心刪除相片，但啲相「自動」消失，真係講都無人信。好彩范太囡囡范凌華都有影相，范太先至唔使靠記憶回味旅程，唔係實畀部衰「鬼」相機激爆。
講番范太嘅日本之旅，可以話食遍北海道，喺松島溫泉旅館歎懷石料理，喺札幌食蟹刺身，喺函館狼吞海膽，喺東京食山形牛，又首嘗坐豪華列車，由東京去北海道遊覽馳名嘅美瑛薰衣草園，眼福同口福都一次過飽晒。