立法會議員李慧琼（Starry）尋日喺選區地頭深水埗西九龍中心搞咗個烹飪比賽，請嚟教育局政治助理楊哲安（Jeremy）及立法會主席曾鈺成煮番兩味。Starry自嘲係「無飯主婦」，遇着只識炒菜及炒飯嘅Jeremy，真係海軍鬥水兵，Jeremy更因手腳慢，畀廚藝了得嘅評判肥媽Maria Cordero窒到飛起。
好少玩煮飯仔嘅Starry尋日選擇整一味ＸＯ醬蒸豆腐，喺義工姐姐幫手下，唔使十五分鐘就煮好上枱。三人之中，負責煮酸菜魚湯浸鱸魚片嘅Jeremy煮得最慢，眼見其他人都收晒爐等開飯，佢依然滋油淡定繼續切菜，快人快語嘅肥媽睇見都唔抵得頸，暗寸Jeremy話：「嘩，你煮得咁慢，似足政府做嘢咁慢慢嚟噃。」被窒到應嘅Jeremy不甘示弱，笑騎騎反駁話：「我慢工出細貨嘛！」比賽最後無分勝負，旨在柴娃娃湊吓熱鬧。
講起入廚心得，娶咗個明星太太張燊悅嘅Jeremy相當幸福，每晚有住家飯食，楊媽媽就煲定靚湯，怪唔得Jeremy啲皮膚咁白滑啦。