蛇王呢個詞，用喺李國寶身上，既係動詞，又係名詞，佢開立法會會議公然蛇王，「三點不露」嘅外號街知巷聞，所以，講到偷懶，佢喺六十名議員之中長期稱王稱霸，立法會議員天主教監察組年年發表報告，佢都扮演「男蛇王」組合嘅鐵膽角色。不過，李國寶被人鬧咗咁多年，似乎丁點愧疚都無，尋日再度登上蛇王榜。

連議會新丁都不如

監察組尋日發表最新報告，特別指出對議員不投票情況十分關注，而李國寶就係其中表表者，喺一百一十二次記名投票中，竟然有九十三次不投票紀錄，令人遺憾。同時，過去一年，有五位議員全年都無提出過任何動議同修正案，李國寶又係其中一個，連贏跑出，蛇王寶座，捨佢其誰！而其他四名全年都無提出過任何動議同修正案嘅議員，分別係劉皇發、霍震霆、黃國健同詹培忠。報告話，劉皇發自九七年特區成立以來，係唯一從未提出過任何動議嘅議員。

不謀而合，新力量網絡尋日發表立法會議決分析報告，其中新任議員與資深議員比較一欄，亦顯示李國寶缺席投票達七十五次，缺席投票率達八成二，雖然兩個調查嘅結果有啲出入，但佢總之就係六十名議員中最離譜嘅一個，連議會新丁都不如。其他缺席率較高嘅議員，係「法律超人」謝偉俊同「怪醫」梁家騮，各達六成。

多次連任政壇悲哀

其實，李國寶唔止袋公帑蛇王蛇到出晒名，民間監察組織更加將佢列入「打蛇」目標之一，不過，李國寶似足一條軟皮蛇，年年蛇王年年鬧，批評當係耳邊風，如有立法會蛇王錦標賽，佢肯定夠資格攞終身成就大獎。其實，既然蛇王寶咁忙，忙到根本無時間、無心機履行議員工作，咪不如辭職唔做議員囉，但係佢又由八五年立法局有功能組別選舉以來做到依家立法會，又畀佢多次連任到，呢個真係唔知乜嘢世界，政壇悲哀，莫過於此！