眼科火車醫院「健康快車」尋晚喺尖沙咀文化中心舉行慈善音樂會，城中名人紛紛撐場。卓妮見到上京曬到塊面紅卜卜嘅光哥，第一時間恭喜佢就快做爺爺，佢顯得有點愕然，繼而笑住承認新抱的確喺今日剖腹生ＢＢ，至於幾點生、係男孫定女孫，光哥就賣關子唔講嘞，佢又否認新抱剖腹產子係為咗擇吉時，笑言如果真係揀吉日，早就揀咗十月一日喎。

改中文名唔講住

光哥一講抱孫就笑唔停，卓妮問佢心情是否緊張，佢開玩笑話：「又唔係我生仔，點會緊張！」不過光哥太太尋晚無陪老公出席音樂會，擺明係為就快抱孫張羅。講起送乜禮物獎勵新抱，光哥話：「送禮？我連個仔都送埋畀佢喎！」但話口未完，佢話禮物一定會送，就係賜個孫一個好名嘞。

光哥決定親自出馬為個孫改中文名，英文名就留番囝囝李霖恩及太太改，到底中文名係乜，暫時唔講住。

同場仲有教育局局長孫明揚及孫太鍾小芬，卓妮問佢哋會否過幾招湊孫心得畀光哥，孫公開心到好似自己抱孫咁，笑唔停。孫太就話：「孫仔唔係要嚟湊嘅，係縱至啱！」

李麗娟「吸水力」驚人，單係首十個月已為各大團體籌款四千萬元。	孫公孫太湊孫心得豐富，同初為爺爺嘅李少光肯定有排傾。	政壇歌王鄭慕智尋晚登台獻唱一曲《You'll Never Walk Alone》。

媽打明年去進修

卓妮八到，呢次慈善音樂會合共籌得二百二十萬港元，當然又係「吸水」能力極高嘅前民政事務局常任秘書長李麗娟嘅功勞，皆因佢係尋晚慈善音樂會嘅副主席。媽打喺過去十個月，合共為各大團體籌咗四千萬元，不過當佢完成晒手上餘下八個籌款項目後，明年中會休假一年去哈佛或者上海名牌大學進修金融課程，順便抖抖。

講番場音樂會，大會請嚟中外著名歌手獻技，唱聖詩唱到街知巷聞嘅「公職王」鄭慕智（Moses）亦粉墨登場，獻唱一曲《You'll Never Walk Alone》，Moses專登提早三粒鐘到場綵排，臨開場前佢一味飲水唔肯食嘢，Moses話勒緊褲唱歌，把聲仲靚啲喎。

卓妮