呢嗱，沙田新翠邨新明樓有部升降機，啱啱完成檢查一個星期就出事，升降機頂門臂鬆脫，打中一名男子頭部，你話幾牙煙呀。

凡有升降機出事，按常理梗係機電工程署孭鑊啦，原來唔講唔知，公共屋邨嘅升降機竟然唔關機電署事，而係由房屋署自己管番，你話奇唔奇吖？

機電署話喎，該署嘅升降機抽查比例由十抽一增加到七抽一，今年頭八個月抽查咗五千零一十四部私樓升降機及一千四百零四部租置屋邨升降機。

表面睇起上嚟，好似真係做咗嘢喎，但睇真啲又有啲奇怪喎，乜香港地只係得私樓同埋租置屋邨兩類建築物咩？恕功夫茶孤陋寡聞，請問咁多公共屋邨去晒邊呀？

原來，《升降機及自動梯（安全）條例》居然唔涵蓋全港公屋，即係話，監管升降機一法兩制，公屋升降機嘅保養及維修，只係靠房署柴娃娃咁根據機電署發出嘅指引及標準做嘢，唔怪得機電署可以翹埋雙手，關人個關啦。喂，人命關天，有冇再兒戲啲呀？

如果房署監管得好都話啫，弊在呢個部門一樣係懶到出汁，監管又係隻眼開隻眼閉！以新翠邨呢單升降機意外為例吖，事件曝光之後，房署只係求其向升降機保養承辦商發出警告信，扣減評核表現分數，仲話會督促呢間公司加強保養及維修工作，確保下次唔會再發生類似嘅事件。

問題係，公共屋邨今年四月至六月一共發生過四單升降機意外，竟然全部係由同一承辦商負責保養。鬼咩，房署發警告信有乜用吖，根本完全冇阻嚇力，難怪承辦商當房署冇到，繼續錯完又錯，意外五花八門乜都有啦。

話時話，房署本身唔係監管升降機嘅專家，點解唔搵機電署做番佢哋嘅老本行呢？如果現行條例有問題，咪修例唔啱改到啱咯；如果話機電署唔夠人，咪增撥多啲資源，請多啲人金睛火眼睇實全港升降機咯。咁簡單嘅嘢，唔使功夫茶教啩。

講到底，咪就係懶囉。特區政府向來施政混亂，政出多門，各個部門又各家自掃門前雪，多部門等於冇部門，集體負責等於集體卸責。公屋居民唔想有日被迫玩笨豬跳，最好就練好腳骨力，日日行十幾層樓梯，咁就真係出入平安得多啦。