海洋公園近年鹹魚翻生刷靚招牌，外界普遍歸功於「蘭桂坊之父」盛智文出任主席後大展拳腳所致。本身係上屆海洋公園主席嘅陳南祿（Philip）接受「莎姐」周梁淑怡節目訪問時，被問到有否酸溜溜嘅感覺？大方得體嘅Philip連番否認之餘，仲透露佢以前自己做主席時都有諗過改革大計，奈何公園虧蝕無錢發展。
Philip在任海洋公園主席短短幾年間，成功開辦萬聖節活動，其後愈做愈受歡迎，於是開辦其他節日活動，並透過控制成本達至轉虧為盈，奈何做出成績後就要卸任，但佢話出過一分力已經好滿足喎。對於盛智文嘅發展大計，Philip就話自己無睇過盤數，所以無資格亦唔應該去評論，只希望海洋公園有更大嘅成功。
貴為馬會董事嘅Philip熱愛賽馬，亦喜歡利用思考去「刀仔鋸大樹」，佢話最多贏過幾多錢就無乜印象，反而有一次輸錢就好難忘。佢話多年前與朋友共四人夾咗四千四百四十元，投注當晚第四場四號馬匹，咁啱該匹馬排第四檔位，賠率又係四倍，當時心諗以為天賜良機啦，結果匹馬跑第四，真係得啖笑！