前排「公職王」鄭慕智（Moses）因公職「爆煲」惹爭議，令Moses被迫「減磅」。本身係律師嘅Moses自己就話公職只係佔佢三分一時間，餘下三分二時間就分畀律師樓及上市公司工作。不過本身屬於建國六十周年慶典觀禮團成員嘅佢，因為身兼北京市政協而要參與海外聯誼會理事會會議，故亦特別提早出發到京，順道喺觀賞閱兵前先開會，睇嚟「公職王」嘅名銜都真係好名副其實！
Moses早前因為過多公職喺身，辭去咗策發會及航空發展諮詢委員會兩項公職。但對佢嚟講可能係件好事，事關佢最近喺一個分享管理時間心得嘅活動上話「依家時間好好多」，只係暑假期間仍然行唔開，皆因唔少上市公司都係八月公布業績，而Moses身兼約十幾間大企業嘅獨立非執董或非執董，梗係行唔開啦！好彩佢細女慧慈今年暑假由外國返港陪佢，Moses大讚囡囡本事，入咗間私人銀行實習，勤力指數拍得住佢。