入境處早排出現「大地震」，被指喺處理「蘇錦樑晒卡片事件」同「泰國包機事件」表現欠佳嘅副處長趙偉佳，突然放長假，「燉冬菇」之說甚囂塵上，副處長一職暫時由助理處長陳國基署任，唔經唔覺都有半個月。
陳Sir尋日首次以入境處「二哥」身份「處男」下海，上電台節目，向來笑容滿面嘅佢，一開始就代表入境處向全港市民講聲「中秋節快樂」，認真識做，表現亦都好淡定，對答如流，頗有大將之風。
不過，由於個電台節目尋日並無接受聽眾Phone-In，加上講嘅都係「十‧一」長假期出入境人潮，同埋考慮畀澳門居民使用e-道等題目，無乜難度，故陳Sir可以輕鬆過關，並未能見到佢處理危機嘅真章，不過，陳Sir以前曾經做過入境處「大公關」，面對傳媒，可說係駕輕就熟。