旅遊發展局尋日搞咗個遠足導賞團，推廣本地嘅遠足旅遊，旅發局主席田北俊、商務及經濟發展局局長劉吳惠蘭（Rita）同漁農及自然護理署署長黃志光都有出席撐場，不過三人嘅行山經驗就大相逕庭。田少眼中嘅「行山」其實只係配菜，主菜係遊船河歎早餐至真。黃志光着晒成副武裝，但係就畀一身短褲出賣咗佢其實係行山門外漢。反而最細粒外表最唔似行得嘅Rita，原來先係真正嘅行山高手！
田少身為今次活動東道主，自然要先同其他參加者分享吓自己嘅行山經驗，佢自言成日都有坐遊艇去西沙灣、斬竹灣一帶行山，但最多都係行到一粒鐘，之後就會上番遊艇對住個無敵海景食早餐，認真識歎，一般平民行山友真係點學都學唔到。
平日着慣西裝坐慣冷氣房嘅黃志光，就特別着咗對行山鞋同帶埋支行山拐杖扮專業，點知Rita一見黃志光嘅下身裝扮，就笑佢着條短褲行山，肯定會畀蚊針死，搞到黃志光一臉尷尬。Rita之後仲反客為主，教導黃志光閱讀由漁護署管理嘅郊野公園地圖，證明Rita真係有啲料。
Rita其後同記者講，自己每個星期都有行山減壓，而且次次都行足全程。不過佢哋三個尋日都只係行咗一小段路就先後快閃離開，冇得即場喺記者面前比併吓耐力。