包括Ｄ姐在內嘅多名特區高官，早前批准前房屋及規劃地政局常秘梁展文轉職新世界中國，之後又唔批前廉政專員羅范椒芬申請出任東華三院總監嘅事件，已經在官場內外引起好大爭議。雖然好多退咗休同即將退休嘅公務員，都對Ｄ姐毫無準則嘅做法深感不滿，不過就敢怒而不敢言，好彩即將有個心口掛咗個「勇」字嘅譚榮邦肯為佢哋出頭，以自己做測試例子挑戰Ｄ姐。

唔等兩年冷河期

譚榮邦自去年十月開始退休前休假後，已唔止一次公開批評政府有關做法，又笑言自己又做過方便營商、又做過房署同郵政工作，按照政府審批羅太個案嘅準則，即係凡係有營過商、寄過信嘅機構佢都唔做得。我哋日前喺馬場撞到佢，佢自爆仲有廿零日就捱過一年嘅就業禁制期，之後會立即搵工做，唔會等兩年冷河期結束。

譚榮邦強調，佢一定唔會搵啲同過往工作有直接利益衝突嘅私人工，但如果政府仍然認為佢搵嘅工作有問題，就請政府自行引證，責任唔喺佢嗰度。大家不妨擔定櫈仔等睇好戲喇！