陳鎮仁做司機撐細佬

尋日嘅青年「十‧一」活動，由香港青聯打頭陣，喺西九龍大空地展示向內地借來嘅巨型五星紅旗，呢支旗來頭唔細，長九十米，闊六十米，重八百公斤，過去曾沿井崗山革命路線展出，尋日六十名嘉賓一齊發力，紅旗懸空舞動，相當壯觀。之後，嘉賓坐老爺車參加第二站青年萬人大巡遊活動，做過香港老爺車會會長嘅陳鎮仁都有份做「司機」。

陳鎮仁同阿Rock都係大興紡織創辦人陳元鉅嘅兒子，兩人平時各有各忙，鮮有出席同一場合，今次中秋節「團圓」，相當難得。玩咗十幾年老爺車嘅陳鎮仁，揸住一架價值不菲嘅私伙英國Daimler老爺車，呢架車以前係港督座駕，回歸後，陳鎮仁喺劏車場買下翻新，變咗佢嘅心頭好。阿Rock話，哥哥由細到大都咁錫佢，尋日係最佳證明。

許華傑（前左三）帶領兄弟巡遊。前中為合和集團接班人胡文新。 （葉華英攝）	香港青聯常務副主席葉振都（左）見到前主席曾智雄，即刻上前請教。	盧文端（左）同兒子盧金榮剛以父子兵陣容上京睇完閱兵。 （何偉鴻攝）

曾智雄趕回家慶中秋

青年馬拉松「十‧一」活動，統籌大旗手係前全國人大常委曾憲梓二子曾智雄，智雄前日喺北京睇完閱兵返港，即時為活動打點，做到凌晨四點。智雄話，尋日活動結束之後，要即刻趕返九龍塘獨立屋，跟爸媽同兩名兄弟過中秋，事關中秋一家團圓係曾家傳統，家規不能違。往年中秋，爸爸曾憲梓會落廚整排骨茶畀大家歎，依家佢老人家行動不便，今年由三弟智明操刀煎牛排。

講開過中秋，全國政協委員盧文端與兒子盧金榮前日剛在北京參加閱兵儀式後返港，當晚隨即約埋家人及孫兒到灣仔食飯迎接中秋，順便慶祝上周四愛駒「福建王子」出賽奪冠，場面溫馨。

卓妮