五十五歲嘅鍾建新能文能武，退休前任職警隊ＰＴＵ沙展，兩年前離開警隊後全情投入創作及教畫，前港姐王愛倫都係佢高徒。

我哋走訪建新嘅大埔畫廊餐廳，講起創作巨型畫因由，佢話去年萌生創作念頭，想以一幅畫展示香港過去幾十年風雲人物，刨書一輪後今年二月動筆，日畫廿幾小時，畫足半年完成呢幅有成10.3米長1.5米高嘅巨作，入選《光明日報》嘅畫冊，本書九月廿六日已喺北京發行，全國有得賣。

建新已將佢幅作品印成巨型海報，放喺餐廳內畀人觀賞，畫中不乏多位叱咤風雲人物，包括孫中山先生、長實主席李嘉誠、賭王何鴻燊、恒地主席李兆基、已故華懋集團主席龔如心等，夠晒大堆頭。

龔如心嘅私人助理王禮泉睇過幅畫後非常欣賞，正義務協助做全球推廣。講開王禮泉，佢身在北京出席建國60周年慶典活動，佢話會繼續龔如心遺願尋找失蹤嘅王德輝下落，亦會為中國發展出一分力。

我哋搵到一張龔如心、王禮泉及海協會會長陳雲林嘅合照，張相攝於○一年，陳雲林當時係中央對台辦主任，可見龔如心早就打通內地人事脈絡。