立法會會計界代表陳茂波（Paul）做咗議員一年有多，精力放晒喺立法會，會計師樓嘅生意就交畀同事打理。為咗更專心從政，最近阿Paul幫會計師樓「升呢」，令一班幫咗佢多年嘅同事有更大發展空間。連同事嘅後路都安排定，睇嚟佢有意全心從政！
翻查阿Paul嘅最近申報發現，除咗佢自己嗰間華德匡成會計師樓外，最近佢做多一間叫做國富浩華（香港）會計師事務所嘅董事。阿Paul話，佢自己間會計師樓得六十幾人，啱啱同有二百幾人嘅陳葉馮會計師樓搞合併，變成依家嘅國富浩華，佢會做合夥人同非執行董事，但唔會多理公司生意。
浩華呢個名喺行內算係二線會計師樓，今次阿Paul幫自己公司「升呢」，佢話係因為自己間會計師樓想再往前行已經有難度，於是透過今次合併，等一班幫佢多年嘅同事，可以有更好嘅發展平台，將來可以接多啲大生意嚟做。今次阿Paul幫同事鋪定後路，咁佢就可以專心做議員，至於做成點，咁就要拭目以待啦！