自由黨副主席張宇人喺四九年九月三十日出生，即係啱啱早過國家一日生日，尋日佢應邀上京出席建國60周年慶典晚宴，就變相令佢冇得喺香港大排筵席慶祝自己六十大壽。不過佢就完全唔覺得可惜，仲好阿Ｑ咁話，有幾千人喺人民大會堂同佢慶祝，不知幾開心！
肥仔張去完國宴返到酒店，再同幾位同行政協及議員落咗餐廳飲嘢，其中「酒仙」黃宜弘仲唔知喺邊度搬咗啲頂級茅台請佢哋飲。大家得知佢六十大壽後，更加即興為佢合唱生日歌，係爭在冇吹蠟燭同切蛋糕，仲熱鬧過喺香港。
肥仔張又話，就算今年唔使上京，都唔會搞太多嘢為自己慶祝，佢只係喺農曆生日時同幾位家人同老友食餐飯，亦有啲好有心嘅朋友記得佢生日，主動請佢擦咗幾餐。不過由於佢要控制體重，即使山珍海味都唔敢食太多，費事之後要節食減磅攞嚟辛苦。