一直表明自己愛國愛港、仲入埋中國籍嘅海洋公園主席盛智文，喺建國60周年慶典觀禮團中，都榜上有名，尋日晨早隨團上京，對於首次參加咁盛大嘅活動，盛智文心情勁興奮，我哋用廣東話翻譯咗佢感受，大致係話：「我係中國人，我嘅感覺非常好，我愛北京，今次能夠獲邀參加盛事，感覺好親切！」
盛智文又話：「我在香港居住咗三十幾年，已經當咗香港係自己屋企喇！」既然咁愛國愛港，咁又識唔識唱國歌呢？盛智文於是話：「I can try！」然後口噏噏，好似唸經咁款，十足以前電視節目《超級無敵獎門人》內嘅「估歌仔」環節，估吓外國人唱乜中文歌，結果加埋幻想都聽唔出佢唱緊國歌，大家都忍唔住笑出來。
雖然場面有啲尷尬，但盛智文話，愛國要發自內心，講內在嘅，並非單憑外表，佢仲好似老竇教女咁，叫在場女記者記住，如果有日男朋友表白話「我愛你」，最重要留意吓男朋友係咪發自內心喎！原來盛智文咁識睇穿人哋嘅心，怕蝕底嘅女士們就要帶啲男朋友畀盛智文過吓目喇！