港區人大政協早已上京，入住北京飯店，特區政府觀禮團尋日先浩浩蕩蕩啟程，入住戒嚴範圍以外嘅港澳中心。話說團員之一嘅康叔前日已上京，老人家習慣早睡早起，尋日朝九點半已到港澳中心大堂索取活動行程，點知負責接待嘅特區駐京辦職員人影都無隻，等到十一點依然無下文，康叔於是在大堂發火大鬧：「參加乜嘢活動又唔知，幾時集合又唔知！」

議員王國興（左）及政協林淑儀喺國宴上留影，大家都係工聯會同聲同氣。	財經事務及庫務局局長陳家強（左）同人大代表黃國健在國宴上喜相逢。	梁高美懿（左）、政協劉皇發（中）及張學明尋日上午結伴去睇展覽。（記者陳雪玲北京傳真）

畀澳門團比下去

相反，澳門政府朝早九點已有近十名職員坐晒喺大堂值班室，負責接待澳門觀禮團，將香港完全比下去。香港特區政府駐京辦有個別先行抵埗職員見狀知衰，立即向康叔「沙冧」，送上一本觀禮團手冊，辯稱行程未確定，先畀康叔睇住先喎。康叔條氣稍為順番，但見到團友黃宜弘又呻過。

負責接待香港觀禮團嘅櫃枱就布滿空櫈，只有兩個職員坐喺度玩手機。

吳康民發火狠批特區觀禮團接待不周，活動同出發時間遲遲都唔通知。（記者黃麗萍北京傳真）

林健鋒唔敢犯險

今次慶典保安嚴密到幾乎連蒼蠅都飛唔入，卓妮八到尋日中午十二時開始京城幾乎戒嚴，北京市二環之內範圍全面封鎖，酒店不會對外開放，店舖全部關門大吉，下午三時就封鎖北飯及長安大街，明日凌晨（二日）才解封，所以想接近住喺北飯嘅人大政協完全不可能。凡參加國宴及今早閱兵儀式人士，亦要遵守多項嘅規定，包括要自動自覺接受安檢，禁止攜帶手機、瓶裝飲料、相機、攝錄機、錄音設備及易燃物品。

雖然講明唔准帶相機，但政協林健鋒卻挑戰權威，帶備大型單鏡反光相機及長短鏡準備瘋狂拍攝，點知去國宴時，大會講明手機都唔准帶，佢當然唔敢越雷池半步、影唔成，但亦有人夠膽帶咗部相機入去留低珍貴嘅回憶。其實尋晚國宴菜式好簡單，人大辦公廳在國宴後隨即喺人大會議中心擺幾圍消夜宴請一班人大，莫非驚佢哋食唔飽？

講番今早閱兵儀式，有份上城樓觀禮嘅本港人士包括行政、立法及司法人員、十六名全國政協常委及全國人大常委范徐麗泰。由於閱兵儀式由入場至結束長達數小時，參加者個個有備而來，包括帶備毛衣、防曬霜、雨傘及穿着舒適平底鞋等，今次有默契畀帶相機及手機，保安相對寬鬆啲。

卓妮