特區政府三司十二局問責官員當中，逾三分之二尋日都上咗北京出席建國60周年慶典活動，剩低仲住緊醫院嘅財爺鬍鬚曾同另外一司兩局喺香港睇檔。留港署任財爺嘅娥姐，不但冇因為冇得上京而心情低落，尋日仲同一批浸會大學嘅學生對話，分享佢為官之道。

娥姐話發展局轄下嘅土地規劃同文物保育政策，喺政治上相當敏感，稍一不慎就會畀人質疑官商勾結同抹殺港人嘅集體回憶，加上政府依家推行問責制，問責官員須為自己嘅決策承擔政治後果，做乜都要步步為營，可以話呢份係佢加入政府三十多年來最具挑戰性嘅一份工。

講到被稱為「好打得」局長，娥姐反而話成日都覺得自己力有未逮，所以每當佢要作出一啲重大或具有爭議性決策時，都會盡早進行公眾諮詢，透過相關諮詢委員會收集民意，集思廣益，「拉多啲人落水」。好似早前北九龍裁判法院舊址判咗畀個外國藝術機構活化營運，引起本地粵劇團體八和會館不滿，好彩有前行會成員陳智思做主席嘅活化歷史建築諮詢委員會，幫佢分擔責任同解畫。早前政府建議以換地方式保留景賢里，最初擔心被指官商勾結，好彩佢一早向各方摸晒底，解釋政府嘅難處同考量，建議先可以順利推行。

最愛做社署署長

不過，喺咁多個佢做過嘅部門同職位中，娥姐最鍾意係社會福利署署長，皆因佢細個讀書時已好想做北斗星幫人，最初入大學時諗住專修社工系，後來輾轉讀咗社會學同入咗政府做，點都估唔到廿幾年後可以實現番年少時嘅夢想。不過由於佢轉去社署前喺庫務局做開，咁啱嗰幾年政府又出現嚴重財赤，喺署內署外都有人質疑政府係專登派佢去管數閂水喉，令佢承受唔少壓力。不過如果好似剛退休嘅社署署長余志穩咁，做到人見人讚，但仕途就黯淡無光嘅，唔知娥姐又會點揀呢？