海關日前揭發有九間燒臘店涉嫌「呃秤」，最多呃秤達三成八，聽落都幾離譜。父親生前開設燒臘店嘅立法會議員甘乃威，尋日喺電台節目解開呢個「呃秤」之謎，話賣燒肉搭豬骨係行內老規矩，事關一隻豬約三十斤，豬頭肉、豬腳、豬手及肥豬肉佔成隻豬三至四斤重，無乜人會買，所以一斤燒肉通常會搭兩至三両豬頭骨落去搭夠數。
又好似賣燒鵝咁，舖頭實會搭個頭同條頸落去，同搭豬骨做法一樣，總之呢啲無人要嘅頭頭手手腳腳稱為「下欄」。甘乃威坦言，今次海關大舉檢舉後，相信燒臘店要改變傳統搭豬骨嘅做法，鑑於豬肉成本上漲，唔搭豬骨肯定要將售價調高到合理水平，消費者就要適應燒肉點解忽然貴咁多嘞！
不過，甘乃威堅稱其父親當年童叟無欺，如果客人指明唔要骨，父親點都會用肥豬肉搭夠。他又憶述，讀中學時，每逢放假就會落舖頭幫手斬燒肉同叉燒，但父親一定唔畀佢用秤砣，擔心佢用秤砣掌握得唔好喎。咁又係，一陣秤多咗就蝕本，秤少咗又畀人鬧「呃秤」，都係電子磅或公秤公正啲。