多名市民昨日致電電台節目講述被呃秤經歷，聽眾馬女士稱，旺角街市呃秤情況十分嚴重，「佢哋好離譜，買兩斤蜜棗呃四両，又試過買四斤半節瓜，卻只得三斤七両。」事後她曾致電海關投訴，「但幾個月都冇影。」

市民：應釘牌或坐監

黃女士亦稱，曾到燒味店購買叉燒時疑被偷龍轉鳳，「明明揀咗嗰舊，事後卻發現顏色不同。」聽眾譚女士則於西灣河一燒臘店幫襯，「我要半隻雞，佢就斬咗成隻畀我，仲逼我畀錢。」有市民認為海關應主動突擊巡查，增加屢被檢控店舖的刑罰，如釘牌或坐監，才能起殺雞儆猴的作用。

灣仔鵝頸橋底有生果店一年被海關檢控呃秤四次，但昨日有電視台記者到該店購買一磅半提子，仍發現少了三安士，店舖負責人解釋只是忙中有錯，並願意補回足夠提子。至於被指呃秤嚴重的灣仔再興燒臘飯店，負責人周女士稱，昨日生意沒有受影響，已打算於數日內轉用電子磅令顧客安心。

海關：曾主動作巡查

海關發言人指，已注意到燒臘店存在呃秤問題，曾主動作出巡查，並會視乎情況加派人手，對個別投訴較多的行業如海鮮和時令水果的商販及廢料回收商等加強檢查。今年首八個月，海關已成功檢控八十八宗觸犯《度量衡條例》的個案，而去年同期則有六十二宗。消費者委員會數字顯示，去年接獲食物呃秤的投訴共有十三宗，而今年首八個月已有十八宗，主要涉及購買海鮮。