謝先生於七月初購入一部二手單車，月前擬將單車停泊在荃灣灰窰角街期間，突遭一名男子鎖車，「佢話我偷咗佢部單車，仲報埋警，之後部車就畀阿Sir（警員）拎咗去荃灣警署！」謝於八月初持買車收據作證，數日後獲警員通知可隨時取回證物，但多次致電均被推搪，「我打咗八次電話，接線生次次都話負責個阿Sir休咗息，叫我遲啲再打，點知一遲就遲成個月！」謝先生終在九月九日取回單車，惟整個八月則需要乘搭巴士上班，無辜損失車費三百多元。

團隊精神自居實質卸責

前投訴警方獨立監察委員會委員勞永樂認為，既然查出真相，證物應立即物歸原主，「個市民無辜畀人話係賊，之後仲成個月冇單車用，條交通費有數得計，應該叫一哥磅番水畀佢！」勞續指，警方一向以團隊精神自居，但實際運作上卻不時出現互相卸責情況，對小市民極不公平，建議可向警方索償，「錢銀事小，攞番個公道事大！」

「一間普通公司都冇理由因為職員放假扣留啲嘢咁耐，如果係咁，真係好得人驚！」立法會議員兼獨立監察警方處理投訴委員會副主席李國麟指出，監警會過去多處理涉及警員態度或濫用特權的投訴，有關證物處理失當事件則較為罕見，「可能有唔少市民都有呢啲遭遇，可能因為怕事或者嫌嘥時間唔同我哋講！」李建議當事人盡快向投訴警察課或監警會投訴，藉以改善警隊服務質素。

警方死撐處理符合程序

法律界人士梁永鏗解釋，市民倘質疑警方認領程序失當導致其財物損失，可透過小額錢債審裁處向警方索償，但由於索償時間需時最少數月，必須要有時間及心理準備才作決定，否則難以完成訴訟。梁續指，由於警方隸屬公務員體系，除向警察投訴部門反映外，市民亦可直接要求申訴專員公署介入調查。

對於被指因負責警員放假而扣起單車逾月一事，警察公共關係科發言人不但未有回應，且死撐處理手法符合歸還證物程序。發言人稱，今年七月底接獲男子報案，聲稱單車遭偷走，現場調查取走一輛單車作為證物，經調查後已於八月底安排將證物歸還謝氏。

記者 梅可茵