中策組尋日舉行一個討論全球經濟嘅研討會，佳叔畀人捉住問佢引入「內傭」單嘢。佳叔話，對社會關心嘅問題，佢哋都會研究，不過中策組每日有一百幾十項研究，內傭單嘢佢就冇參與，唔係好熟悉；以佢所知，個研究未做完，亦未有結論，所以未向政府提出建議。咁幾時完成呢？佳叔就實話實說，話呢個唔係迫切問題，未有時間表；咁講法，擺明係要為呢個燙手山芋急降溫。

出席論壇嘅前保安局局長葉太，亦不留情面潑多幾吓冷水，話呢個建議不可行，牽涉到居港權問題，事關內地人來港居住滿七年就可申請居留資格；即使政府度橋限制做滿六年嘅內地家傭唔准留港，都唔代表解決咗問題，內地人照樣可以提出司法覆核，到時政府就要面臨司法挑戰，到時領功唔成，分分鐘惹來一身蟻。