財爺鬍鬚曾前晚急性心臟病發入院，尋日我哋咁啱就喺香港會撞到患腦部血管瘤而辭職嘅前商務及經濟發展局局長馬時亨，可能大家都係做官捱出病，肥亨話佢前晚第一時間發手機短訊慰問鬍鬚曾，祝願佢早日康復。肥亨話，做人最緊要係健康第一。咁又係，肥亨一知道自己有病就辭官休息，多做運動，體重由二百磅減到得番一百八十磅，不但大肚腩無咗，血壓又一直保持得好好。
肥亨話，做運動要持之以恒，好似佢日日唔係打波就係做健身，如果身在香港，例牌每朝到香港會做健身，就算之前去咗北美三個星期，期間去加拿大探朋友，都堅持Keep住做運動。不過，肥亨教路，想身體健康並非單憑做運動就得，有時都要睇平時嘅飲食係咪健康嘅，例如月餅咁高膽固醇，佢掂都唔敢掂，將收到嘅月餅轉贈晒畀有需要嘅人。
其實肥亨上周六先至由美國返港，早過鬍鬚曾一日返港，由於鬍鬚曾要去匹茲堡，所以飛機航程較肥亨由紐約返港長十幾小時。肥亨馬不停蹄，稍後又要參加兩項活動，一項係支持太太王培琪嘅全城更新活動，另一項就到馬灣挪亞方舟演講一場，聽落都幾忙㗎！
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |