唔係胡定旭講，好多人都唔知，原來小市民一直怪錯人，各種離奇古怪嘅醫療事故當中，最大嘅受害者唔係病人，亦唔係佢哋嘅家屬，竟然係前線醫護人員喎，真係一百歲唔死都有新聞！

胡定旭話喎，早前調錯嬰兒事件發生之後，佢覺得前線醫護人員嗰一刻好需要關心同埋鼓勵，於是第一時間去伊利沙伯醫院嘅產科病房安撫吓佢哋，見到有啲好傷心，好失落，仲有幾個忍唔住喊咗出嚟添。聽胡定旭咁講，差啲仲以為醫護人員嘅ＢＢ都畀人調錯呀！

胡定旭完全唔提點解會發生咁多醫療事故，更加隻字不提問責及處分，只係話好理解醫護人員傷心嘅原因，仲死撐無心之失有時真係在所難免，出咗事人人都鬧佢哋，記唔起佢哋努力工作，無私為市民服務。如果因為一時無心之失而受所有人指摘，信心盡失，會令佢哋從此一跌不起。

有冇搞錯呀，咁樣掉轉嚟講都得，好似講到市民怪錯醫護人員咁，出錯嘅人反過來變成受害者，咁嘅歪理都諗得出，真係要寫個服字呀。咁胡定旭有冇諗過病人同埋家屬嘅感受，入去醫院小病變大病，大病變冇命，佢哋咪仲沮喪、仲傷心！

冇錯，絕大部分前線醫護人員都係盡心盡力，無私為市民服務，呢點係無可否認嘅，沙士一役已經足以證明。問題係依家頻頻出錯，如果真係咁唔好受，咁就應該打醒十二分精神，盡量唔好出錯咪得囉。

胡定旭作為醫管局主席，唔係淨係呵護及安撫醫護人員就得，而係要切切實實搵出問題所在，並盡快堵塞漏洞至有用吖嘛。如果係前線人手不足，咪快啲請多啲人囉；如果係管理出咗問題，咁仲簡單，快啲炒晒嗰班尸位素餐嘅廢官，到時冇醫療失誤，病人有信心，讚都讚唔切啦，又點會對醫護人員不滿喎。

弊在成班醫療高官完全唔識反躬自省，淨係識大噴口水花，左一句要完善醫管局嘅系統和程序，將出錯嘅風險減到最低；右一句推動專業服務、團隊精神、敬業樂業嘅核心價值。

鬼唔知阿媽係女人咩，做得到至講啦！大家可以見到嘅係，醫管局從來唔當人命係一回事，次次出咗事就做場熟口熟面嘅大戲，調查又調查、檢討又檢討、再發Ｎ咁多個指引，但醫療事故依然長爆長有，而且愈爆愈多，愈爆愈勁添。

遠嘅唔講，醫管局最新嗰份《風險通報》自爆幾單，犀利咯，醫錯眼、剝錯牙、插錯喉、開錯藥，諗得出諗唔出嘅都應有盡有，簡直係醫療事故大雜燴。

計功夫茶話齋，既然胡定旭寫《香港家書》咁叻，不如幫人寫埋《香港遺書》吖，笨！