保安局局長李少光近排做好心理迎接十月來臨，皆因乖仔李霖恩同新抱方燕凌嘅ＢＢ快將出世，即係光哥準備榮升爺爺級數。光哥前日路過遮打花園，見佢心情勁靚，一講起抱孫，就興奮話：「十月差唔多生得喇！」問光哥心情緊唔緊張，佢就話唔夠當年睇住霖恩出世咁緊張，現在乖孫出世，應該輪到做首任老竇嘅霖恩緊張吓嘞！
霖恩初為人父，唔知有無收到家傳錦囊呢？光哥就話唔使特別教霖恩點做，相信霖恩咁大個仔應該應付得來。光哥仲透露，最近大李太（光哥太太）同霖恩已經準備好晒ＢＢ床、奶粉及紙尿片等一切嬰兒用品，唔使佢操勞，疊埋心水等抱孫就得嘞。講咗咁耐，都未知究竟係男孫定女孫，光哥話要賣個關子，等ＢＢ出世時畀大家一個驚喜，總之一有消息就會通知大家。
不過，十‧一臨近，光哥都要上京睇閱兵，起碼去兩至三日，新抱有可能撞啱嗰幾日生得，光哥肯定心掛掛，相信完成任務後就會火速回港。